Wedding.expo.com.hk 囍慶會
  Please visit our new website and update your bookmarks! You may also visit our old website, but it will no longer be updated.
Wedding.expo.com.hk 囍慶會
 
Wedding.expo.com.hk 囍慶會
Untitled Document
新婚廣場商店專區
超人氣商店
Untitled Document
General Contact
Online Inquiry
 

我要訂造克勤結婚套西裝!

今次係小記我頭砲為大家介紹超人氣商店,不容有失,人氣量當然亦唔少得。

究竟係邊間?佢就係係油麻地廟街有幾十年歷史既洋服店-龍將洋服。你或者會話:「車!一間洋服店,有幾威水呀?」小記我個偶像李克勤結婚套飲衫都係搵佢做,你話威唔威?

話說小記有日無聊經過油麻地廟街,行過佢舖頭,見倒佢舖頭門口有張大相,相中人正正係我偶像克勤,相入面有個肥佬幫克勤度緊身,咁我咪好好奇咁,想入去問個究竟。一入到去,見倒個肥佬望望我,我又望望佢,跟住佢就話:「點呀?四眼哥仔,想做西裝呀?你黎得岩,搵岩人啦!」

咁又係喎,入得黎洋服店,唔係做衫就係做褲架啦!冇理由話畀佢知我淨係想問克勤結婚套老西係咪佢做。諗諗下小記都有需要做番兩條西褲,就話:「係呀老細,想做西褲,有乜好介紹丫?」

「介紹緊係有,但係你想做幾錢條先?你想做二佰蚊條我又可以介紹,你想做二千蚊條我又有好介紹,你話係咪先哥仔?」佢一輪連珠炮發,我差不多冇還手既能力。

聽倒二千蚊條,當堂眼都突埋:「咁...我又唔駛做咁貴既。咦?係啦,門口咪貼住五舊水兩條既,係咪?」

「唉,四眼哥,好老實講,五舊水兩條係有,不過D料肯定差D,一分錢一分貨,你話係咪?你可能又會話咁差D你又賣比人?喂大佬呀,有人買平,有人買貴架嘛,你估個個都係李嘉誠咁有錢咩?況且我地都要做D優惠出黎吸引顧客,你睇你,咪走左入黎囉,呵呵呵!」

蝦!呢個肥佬老細又幾鬼死老實,雖然佢講野串串地,不過實話實說,我鍾意!跟住就同佢傾下邊隻料平,邊隻料正。

佢一邊同我度身,一邊講:「拿,你要幾多寸,你自己決定。咁呢,就鬆身D,咁呢,就緊D;咁樣又會長D,咁樣就短D;有摺就老套D,冇摺就新潮D...」

比佢攪到頭都赤埋,乜野又長又短,又鬆又窄。我同佢講:「你幫我決定啦,你係師父我唔係,我信專業架!」

佢即時笑逐顏開,挺起胸膛咁同我講:「四眼哥,你講得冇錯呀!我的確係專業架!我十幾歲出黎做,一做就做左成四十年,出黎做個陣你都未出世呀!你知唔知?我望一眼就知你隻腳有幾長,望一望就知你條腰有幾粗。係呀,好多人都話我講野串,其實我就唔係串,只不過我話佢知要幾寸佢地唔聽,係都要自己話事,我實由得佢,佢比錢,我無謂同佢拗,不過我講明,如果佢堅持用自己既呎吋,改褲我要收佢錢!緊係啦,要我做多野。不過,到最後咪又係搵番我改!」

呢個肥佬老細,真係幾健談,一講就同佢講左半個鐘,趁佢抖氣個陣,我就乘機問佢:「喂,老細,見你幅相同克勤度身,佢幫襯過你?」

唔講由自可,一講佢又停唔倒:「冇錯係呀!」佢仲拿拿聲搵左幾本訪問佢既雜誌:「你自己睇啦,唔好話我吹水老作,克勤結婚套老西係我幫佢做架!點呀,型唔型仔呢?」

「型...緊型啦,克勤喎!」

「唔止呀,仲有華仔呀,唉,我都唔記得咁多,總之好多明星都係幫襯我架。」

「嘩?乜你咁巴閉?識佢地好耐架啦?」

「華仔就耐D,成十年啦,克勤都係近呢幾年先識既。咦?喂!你問咁多做乜,條褲得架啦,做好打畀你啦!唔好問呢樣問個樣阻住做生意!」

後記:條褲真係好岩身,肥佬老細真係掂!專業!

 

TXT S.M.Chan
2007.1

返回頁首

 
Untitled Document

Wedding.expo.com.hk 囍慶會
主辦機構